Die voorgestelde Musina-Makhado Spesiale Ekonomiese Sone (MMSES) in Limpopo sal ’n vernietigende impak op die inwoners en die biodiversiteit van die Limpoporivierkom hê en moet daarom geskrap word.
So lui ’n prokureursbrief aan die provinsiale departement van omgewingsake deur drie nieregeringsorganisasies (NRO’s). Buitendien kan die departement nie oor die toekoms van die MMSES beslis nie omdat hy ’n direkte belang by die voorgestelde ontwikkeling het, lui die brief.
Earthlife Africa, groundWork en die Mining and Environmental Justice Community Network of South Africa sê in die brief die omgewingsimpakproses wemel van foute en is vol leemtes.